SotDur – musikk ved breens rand
Musikk, fjelliv og aktivitetar står på programmet når den nye festivalen SotDur blir arrangert på Sota Sæter for fyrste gong. Gjennom tre dagar skal festivalområdet fyllast med både konsertar, kurs og naturopplevingar
Helga 7. til 9. august blir den aller fyrste utgåva av musikkfestivalen SotDur arrangert på Sota Sæter. Festivalen kombinerer musikk, friluftsliv og aktivitetar, og skal gå føre seg ved innfallsporten til Breheimen.
Sota Sæter er ei av dei tradisjonsrike turisthyttene i Breheimen og har i mange år vore eit naturleg utgangspunkt for fjellturar og naturopplevingar. Under festivalhelga blir tunet og områda rundt nytta til både konsertar og aktivitetar
Festivalen startar roleg fredag. Deltakarane kan bli med på fellestur til Tverrådalen, der det også blir konsert med det lokale bandet Yonko Skriu. Utover kvelden tek festivalen seg opp med konsertar frå The Rumble Bunch og Læven.
Laurdag blir på mange måtar hovuddagen under festivalen. Då er det aktivitetar gjennom dagen, før artistar som Moddi, Bjørn Tomren, Mikkel Rev og Død Drøm står på scena.
Musikkprogrammet spenner over fleire sjangrar. Publikum kan oppleve alt frå pop og rock til folkemusikk, og meir særprega uttrykk som jodling og strupesong. Ifølgje festivalsjef Ove er målet å setje saman eit program med brei appell.
– Likar du musikk, burde du her klare å finne noko som passar for deg, seier Ove.
Sjølv om musikken står sentralt, blir det også arrangert ei rekkje andre aktivitetar gjennom helga. På programmet står mellom anna jogging med bobler og bad, kokkekurs på bål, quiz, spikkekurs og dansekurs. Tanken er å gje deltakarane tilbod både på og utanfor konsertscena. Det blir også mogleg å kjøpe mat på festivalområdet, og Sota Sæter legg opp til servering gjennom helga.
For dei som ønskjer å reise kollektivt, blir det sett opp bussar frå Vågå, Lom og Skjåk. Det er framleis mogleg å bestille overnatting i naturcampen for dei som ønskjer å vere på Sota gjennom heile festivalhelga.
Med både lokale innslag og nasjonalt kjende artistar markerer SotDur eit nytt kulturtilbod i Skjåk. Festivalen tek i bruk både naturen, kulturen og møteplassane på Sota Sæter, og blir arrangert for fyrste gong denne sommaren.
