NUK AS – bedriftsportrett
Da Dmytro Artemenko kom til Skjåk frå Ukraina i 2023, hadde han med seg 24 års erfaring frå byggjebransjen. Han fekk etablerarstipend frå Skjåk kommune og starta bedrifta NUK AS, som er ei veksande byggjebedrift med tre faste tilsette og tre vikarar. Ambisjonen er å skape fleire arbeidsplassar og utvikle verksemda vidare i Skjåk.
Frå Ukraina til Skjåk
Dmytro Artemenko kom til Skjåk frå Ukraina saman med familien sin i 2023. Han er utdanna byggingeniør og hadde med seg 24 års erfaring frå byggjebransjen i heimlandet.
I Ukraina arbeidde han mellom anna som prosjektleiar i selskapet Agent Bud, som hadde om lag 600 tilsette. Der jobba han som prosjektleiar i store byggjeprosjekt.
Etter at han kom til Skjåk, tok han på seg snikkaroppdrag for fleire lokale verksemder. Han arbeidde både med renovering og nyoppføring av hus, og var mellom anna med på restaureringsarbeidet på skulen i Marlo. Han tok også på seg oppdrag for Boligpartner Nord-Gudbrandsdal.
Erfaringane og kontaktnettet han bygde opp, gav grunnlaget for å etablere si eiga bedrift.
Etablerarstipend gav fart i oppstarten
Skjåk kommune si ordning med etablerarstipend skal gjere det lettare for førstegongsetablerarar å starte og utvikle nye verksemder i kommunen. Stipendet blir vurdert ut frå kva sysselsettingseffekt etableringa kan få.
NUK AS fekk 150 000 kroner i etablerarstipend frå Skjåk kommune. Dmytro fortel at støtta var viktig for at han skulle kunne få bedrifta opp å stå. Utan etablerarstipendet meiner han at det ville ha teke fleire år å byggje opp verksemda til det nivået ho er på i dag. Støtta gav han moglegheit til å kome raskare i gang og leggje grunnlaget for vidare vekst.
Ei bedrift i vekst
NUK AS tilbyr mellom anna oppføring av bustader, renovering, rehabilitering, flislegging og tilbygg. Bedrifta tek oppdrag både i Skjåk og andre stader i landet.
Da vi møtte Dmytro og kollegaen som også heiter Dmytro, arbeidde dei på eit hus på Uppnose. NUK AS har også utført arbeid ved barnehagen i Bismo, og neste år ventar mellom anna eit større renoveringsoppdrag på Pollfoss. Nye kundar kjem i stor grad gjennom anbefalingar frå folk som bedrifta tidlegare har utført arbeid for.
– Vi har ikkje hatt problem med å få arbeid. Folk anbefaler oss vidare, og det gir oss nye oppdrag, fortel Dmytro.
Sjølv om NUK AS arbeider over eit stort geografisk område, ønskjer han seg fleire oppdrag i Skjåk og nærområdet. I dag har bedrifta tre fast tilsette og tre vikarar. Alle er ukrainarar som bur i Skjåk.
Lærer gjennom praktisk arbeid
Ein av dei tilsette er 27 år gamle Dmytro Telpis. Han arbeidde som kokk i Ukraina og hadde inga erfaring frå byggjebransjen før han begynte i NUK AS.
Etter rundt halvanna år i bedrifta har han fått erfaring innan eit nytt fagområde.
– Det er både artig og lærerikt. Eg lærer mykje gjennom arbeidet, seier Dmytro Telpis.
Begge to har delteke på norskkurs. Språket kan framleis vere utfordrande, men dei opplev at kommunikasjonen stort sett går bra. Dmytro fortel at det norske byggjeregelverket var litt vanskeleg å forstå i starten. Samstundes kjende han att mykje frå Ukraina, der det også var omfattande krav til byggjeprosjekt. Den største forskjellen har vore andre byggjemateriale og byggjemetodar.
For å sikre at prosjekta blir gjennomførte i tråd med norske krav, samarbeider NUK AS med Nordplan om kontroll og fagleg oppfølging.
Planar for framtida
NUK AS leiger lokale i Ofossenbygget. Lokalet blir i dag brukt som materiallager, men Dmytro kjøper gradvis inn utstyr med mål om å starte produksjon av kjøkken- og baderomsinnreiing.
På sikt ønskjer han at møbelproduksjon kan bli ein større del av verksemda og gje grunnlag for fleire arbeidsplassar.
Han ønskjer også at dei tilsette skal ta meir norskopplæring og relevant fagutdanning. Eit anna mål er at NUK AS etter kvart skal kunne ta imot ungdom og utvikle seg til å bli ei lærebedrift.
Familien trivst i Skjåk
Dmytro bur i Skjåk saman med kona, dei to barna på tre og åtte år og mor si. Familien har funne seg godt til rette, og særleg barna trivst svært godt.
– Barna elskar å bu her. Eg kunne kanskje ha tenkt meg ein litt større by, men dei ønskjer å bli i Skjåk. Da ønskjer vi å bli her som familie, fortel han.
På kort tid har NUK AS utvikla seg frå ein idé om å starte eiga bedrift til ei verksemd med seks medarbeidarar. No er målet fleire lokale oppdrag, fleire tilsette og vidare utvikling av bedrifta i Skjåk.
